Маркус Рашфорд е подготвен да се пресели во Фенербахче по телефонски разговор со неговиот поранешен менаџер Жозе Мурињо, објавува турското издание „Фотомач“. Двајцата соработуваа во периодот од 2016 до 2018 година, кога португалскиот стратег го водеше Манчестер Јунајтед, а Рашфорд постигна 28 голови на 125 натпревари под негово водство.
Англискиот напаѓач е меѓу фудбалерите на Манчестер Јунајтед кои активно бараат излез од „Олд Трафорд“ ова лето, а трансферот во турскиот гигант изгледа сè пореален.
27-годишниот Рашфорд беше испратен на позајмица во Астон Вила во јануари, по конфликт со актуелниот менаџер Рубен Аморим. Иако се споменуваше и сериозен интерес од Барселона, сега Фенербахче се наметнува како главен кандидат за неговиот потпис. Се очекува турскиот клуб да испрати понуда за позајмица со опција за откуп, а преговорите со Манчестер Јунајтед се закажани за крајот на неделата.
Фенербахче, кој го назначи Мурињо минатата година, заврши на второто место во турската Суперлига зад Галатасарај и планира агресивна трансфер-стратегија ова лето. Досега клубот веќе ги доведе Софијан Амрабат и Џон Дуран.
