Баер Леверкузен продолжува со своите импресивни настапи во Бундес – лигата, убедливо совладувајќи го Фрајбург со 5-1 во 15. коло. Тимот на Чаби Алонсо уште еднаш покажа дека и оваа сезона има шампионски квалитет.
Во првото полувреме, „фармацевтите“ стигнаа до минимална предност со погодокот на Патрик Шик. Флоријан Вирц пропушти голема можност во 33. минута, не реализирајќи пенал, но тоа не го разниша нивниот настап.
Во вториот дел, Вирц постигна гол во 51. минута, по што Шик ја презеде главната улога на натпреварот, реализирајќи уште три гола и осигурувајќи го триумфот со вкупно четири гола на своето конто.
Баер Леверкузен сега има 32 освоени бода, само четири помалку од лидерот Баерн Минхен.
Во следното коло, Баер Леверкузен ќе гостува кај Борусија Дортмунд во дерби натпревар, додека Фрајбург ќе го пречека тимот на Холштајн Кил на домашен терен.
