Почнува Бундес – лигата: Може ли некој да го загрози Баерн Минхен?

Германската Бундес – лига се враќа на сцената. Стартува вечерва, а во првиот натпревар ќе го видиме на дело шампионот Баерн Минхен. Баварците ќе гостуваат кај силниот тим на Борусија Менхенгладбах само три месеци откако ја освоија деветтата титула во последните десет сезони.

Големото прашање пред секој почеток на Бундес – лигата е дали има кој да ја спречи доминацијата на домашната сцена на Баерн. Минатата сезона, баварците ја завршија со 13 бода повеќе од вицешампионот Лајпциг и со 14 пред третопласираниот тим на Борусија Дортмунд. Токму овие два тима повторно ќе се борат за круната со Баерн, кој ја започнува сезоната со нов тренер, Џулијан Нагелсман и без клучните фигури од претходните години во одбраната како што се Давид Алаба и Џером Боатенг.

Дајот Упамекано, кој работеше со Нагелсман во Лајпциг, е новото лице во Минхен. Тој и Французинот Лукас Хернандез Ќе го формираат новиот централен одбранбен тандем. Баварците имаат силен прв тим, но проблемот е недостатокот на квалитетни резерви и сигурно дека на тоа ќе се работи на „Алијанц арена“ до крајот на преодниот рок.

Во исто време, длабочината на составите на Лајпциг и на Борусија Дортмунд се чини дека е поголема, но конзистентноста е она што им недостасува.

Борусија Дортмунд остана без Џејдон Санчо. Главните засилувања на „Сигнал Идуна Парк“ се голманот на Штутгарт, Грегор Кобел и напаѓачот на ПСВ Ајнховен, Дониел Мален, кој треба да го замени Санчо. Ѕвездата на тимот Ерлинг Халанд остана и покрај постојаните шпекулации за неговата иднина и се очекува повторно да постигне многу голови за Дортмунд.

Лајпциг се раздели со две главни фигури како Дајот Упамекано и Ибрахима Конате. Ова сепак не е проблем за тренерот Џеси Марш, кој вели дека има квалитетни замени. Тој ќе има тешка задача да го наследи Нагелсман, но покажа амбиција да биде поуспешен и покрај притисокот со кој се очекува да се соочи.

Прелиминарните очекувања се дека овие три екипи ќе се борат за титулата, а нивниот мир традиционално ќе се обидат да го нарушат екипи како Волфсбург, Баер Леверкузен, Борусија Менхенгладбах…