Поранешниот капитен на Барселона, Жерар Пике, го прозва Реал Мадрид по жалбата на „кралскиот клуб“ за арбитражата во Ла Лига. Тимот се пожали на судиите по натпреварот со Еспањол преку својата клупска телевизија, а исто така испрати и отворено писмо до Шпанската фудбалска федерација.
„Она што го прават не е ништо ново, тие се однесуваат на овој начин веќе 120 години. Кога ќе загубат, ја менуваат темата и добиваат помош од медиумите. Сите сме навикнати на тоа“, изјави Пике.
Тој не застана тука и ја коментираше трансферната политика на двата шпански гиганти.
„Сè уште има многу таленти кои играат во Шпанија денес, Барселона ги создава, а Реал Мадрид ги купува“, додаде поранешниот репрезентативец.
Реал Мадрид е лидер во Ла Лига со 49 бода, Атлетико е второпласиран со 48, а Барселона се наоѓа на третата позиција со 45 бода.
