Каталонската телевизија „ТВ3“ јавно го прозва дефанзивецот на Барселона, Жерар Пике, дека заработува премногу во периодот кога клубот се наоѓа во голема финансиска криза. Оваа вест привлече големо внимание, па мораше да ја демантира и самиот Пике.
Ставот на „ТВ3“ е дека капитенот Серхио Бускетс и неговите заменици Жерар Пике и Жорди Алба сè уште имаат огромни годишни примања, дури и по драстичното намалување на платите во клубот. Беше објавено дека Пике заработувал 28 милиони евра годишно пред намалувањето на платата и дека формално го потпишал намалувањето, но дека сето тоа го надоместил преку бонуси за лојалност.
Сепак, следуваше жестока реакција на Пике. Тој на Твитер го објави документот од својата последна плата во Барселона, поточно половина од неговата годишна заработка. Сумата изнесува 2.328.884,39 евра.
Ова значи дека Пике во Барселона заработува нешто повеќе од 4,65 милиони евра годишно. Значи, шестпати помалку од сумата што „ТВ3“ ја објави претходно.
