Голгетерот на Наполи, Виктор Осимен денеска беше фотографиран во Берлин, што ги подгреа шпекулациите дека е блиску до преселба во Баерн Минхен. Германскиот гигант е еден од многуте кандидати за да го купи фудбалерот на новиот италијански шампион.
Осимен е фотографиран како излегува од хотел во Берлин со својата девојка Стефани Ладевиг и нивната едногодишна ќерка. Сепак, Стефани Ладевиг е од Германија и можно е тројцата да биле на гости кај нејзините роднини.
Според „Билд“, во моментов нема разговори меѓу Наполи и Баерн за Нигериецот, бидејќи Баварците веруваат дека неговата цена е превисока за нивните можности.
„Наполитанците“ во принцип не сакаат да се разделат со него, но доколку се согласат на тоа, се очекува сумата да биде над 100 милиони евра.
