Новиот прволигаш Гостивар се наоѓа на крстопат, а тукушто влезе во Првата лига. Најголем дел од тие што го обезбедија пласманот во елитата, второто место во Втората лига во сезона без пораз, си заминаа од клубот. Најново име што заминува е единствениот гостиварец, Бирол Топчиу кој беше асистент во стручниот штаб и на Октај Дерелиоглу, а потоа и на Мурат Дабан.
Топчиу можеби беше и базичниот сегмент досега, преговараше со фудбалерите, беше многу повеќе од асистент, беше и преведувач во клубот, со оглед дека знае и македонски, и турски и албански јазик, во мултинационалниот тим и клуб.
„После 10 години сме во Прва лига, нешто прекрасно. Како единствен гостиварец во екипата, легенда на клубот и на градот, чест ми е што бев дел од тимот што го заслужи пласманот во елитата. Најзаслужен што влегов во Првата лига е претседателот Енес Уста. За жал, не сум веќе дел од екипата поради тројца во клубот, а зошто – само тие знаат“, објави Топчиу.
