Клубовите од Европа, посебно од големите 5 лиги, добија право да им забранат на фудбалерите да заминат на репрезентативен повик во март, одлучија во ФИФА. Ова значи дека и селекторот Игор Ангеловски би можел да има проблеми при собирањето на националниот тим за првите три меча од квалификациите за СП 2022 во Катар.
Македонија на 25 март гостува на Романија, три дена подоцна го пречекува Лихтенштајн, а на 31 март ќе игра на гости против првиот фаворит Германија.
Секоја земја има право да одлучува која дестинација влегува во критична зона од која фудбалерот при враќањето би морал да замине во карантин. Во таков случај клубот не е должен да го пушти на репрезентативен повик.
Ова право би можеле сериозно да го користат клубовите од Италија, а таму Македонија ги има Горан Пандев (Џенова), Елиф Елмас (Наполи), Илија Несторовски (Удинезе) и Бобан Николов (Лече). Проблематично може да биде доаѓањето на Езгјан Алиоски (Лидс Јунајтед) од Велика Британија, како и настапот на интернационалците од Шпанија – Енис Барди (Леванте), Столе Димитриевски (Рајо Ваљекано) и Александар Трајковски (Мајорка).
