Проблемите со повредите на Баерн Минхен продолжуваат со полна сила. Денеска Баварците објавија дека новото зимско засилување Саша Бои, за кого на Галатасарај му платија близу 30 милиони евра, заработи повреда и ќе биде надвор од терените за претстојните важни натпревари на тимот.
„Баерн ќе биде без Саша Бои во следните неколку недели. Новото зимско засилување се здоби со скинати мускулни влакна на левиот бутен мускул. Ова е резултатот од прегледот кој го направи медицинскиот оддел на Баерн“, соопшти официјално германскиот првак.
Ова е уште еден играч во тимот со повреда, бидејќи моментно повредени во составот на Баварците се Алфонсо Дејвис, Кингсли Коман, Серж Гнабри, Конрад Лајмер, Даниел Перец и Буона Сар.
Саша Бои беше внесен во тимот токму со надеж дека ќе ја засили десната странична позиција во одбраната. Единствен здрав играч на оваа позиција останува Нусаир Мазрауи.
