Наполи оствари важна победа во Серија А, совладувајќи го Емполи со убедливи 3-0 пред домашната публика. И покрај неодамнешните осцилации во формата (две победи и три ремија во последните пет кола), тимот на Антонио Конте останува во трката за титулата и сега се наоѓа само три бода зад лидерот Интер.
Емполи, кој во последните три меѓусебни пресметки успеа двапати да го победи Наполи, овојпат немаше одговор за дисциплинираната и ефикасна игра на домаќините. Главни протагонисти на победата беа поранешните играчи на Манчестер Јунајтед, Ромелу Лукаку и Скот Мектоминеј.
Мектоминеј го отвори резултатот во 18. минута со својот седми гол сезонава, по асистенција од Лукаку. Белгиецот потоа во првата минута од второто полувреме сам се запиша во листата на стрелци, носејќи му на Наполи водство од 2-0. До крајот на натпреварот, двоецот повторно се поврза – Лукаку и овојпат одигра клучна улога, а Мектоминеј постигна уште еден гол, поставувајќи ги конечните 3-0.
Во следното коло, Наполи ќе патува на гости кај Монца, додека Емполи ќе се соочи со Венеција.
