Килијан Мбапе му рекол на претседателот на ПСЖ, Насер Ал-Келаифи, дека ќе остане во клубот, објави „Ле Паризиен“, а потоа потврди и „Скај Спортс“ и неколку други светски медиуми.
Француската ѕвезда не го продолжи договорот со ПСЖ, што значи дека следната година би можел да замине бесплатно. ПСЖ не сака да го загуби Мбапе без евентуално рекордно обештетување, но со задоволство би го продале во наредните недели.
Досега се споменува сума од околу 200 милиони евра. Апсолутен рекорд и понатаму е трансферот на Нејмар, кого ПСЖ во 2017 година го доведе од Барселона за 222 милиони евра.
Сопствениците на ПСЖ веруваат дека Мбапе веќе ги договорил условите со Реал Мадрид, а шпанскиот гигант наводно го чека крајот на летниот преоден рок за да го добие напаѓачот за пониска цена, сметајќи на паника во парискиот клуб. Сепак, Мбапе сега изјави дека во никој случај нема да си замине ова лето, ќе го чека следното кога ќе биде слободен агент.
