Двата италијански гиганти, Милан и Јувентус, разгледуваат можност за директна размена на фудбалери, Тео Хернандез и Душан Влаховиќ. Според информациите на „СпортМедијасет“, веќе се започнати прелиминарни разговори за евентуалната зделка.
И двајцата играчи се споменуваат како потенцијални заминувања ова лето, бидејќи нивните договори истекуваат во јуни 2026 година, а преговорите за продолжување се заглавени. Милан не сака да ризикува да го загуби Хернандез без обештетување, додека Јувентус не е блиску до нов договор со српскиот напаѓач.
Новото засилување на клупата на Милан, Масимилијано Алегри, го гледа Влаховиќ како идеален избор за предниот ред, додека „старата дама“ е во потрага по лев бек од врвна класа – а Хернандез би бил идеално решение.
Иако двата клуба ги проценуваат своите фудбалери на околу 30 милиони евра, проблем може да бидат платите. Влаховиќ моментално заработува 12 милиони евра годишно во Торино, сума што Милан тешко може да ја понуди. Од друга страна, Тео Хернандез бара нов договор со плата од 6 милиони евра годишно – нешто што Јувентус може да го исполни.
Се очекува разговорите да продолжат во наредниот период, а останува да се види дали оваа невообичаена размена ќе се реализира.
