Менаџерот на Челси, Енцо Мареска, ги демантираше шпекулациите дека клубот е заинтересиран за крилото на Манчестер Јунајтед, Алехандро Гарначо. Италијанскиот стратег изјави дека е целосно задоволен од играчите на крилните позиции во тимот и дека нема потреба од нови засилувања на тие позиции.
„Веќе многупати реков дека сум задоволен од составот што го имам во моментот. Од десната страна ги имаме Педро Нето и Нони Мадуеке, од левата се Џејдон Санчо, Миша Мудрик, кој моментално не е со нас, и Тајрик Џорџ, млад играч кој може многу да ни помогне во моментот“, изјави Мареска.
Италијанецот исто така ги коментираше новостите во тимот пред натпреварот против Манчестер Сити, повторно упатувајќи пофални зборови за клубот од „Етихад“ и за Пеп Гвардиола.
„Можеби Ливај Колвил и Енцо Фернандез ќе бидат подготвени за Манчестер Сити. Ромео Лавија е „аут“. Сè уште не знаеме колку е сериозна повредата. Треба малку да почекаме, но сигурно ќе биде отсутен уште неколку недели“, додаде Мареска.
