Легендарниот менаџер на Манчестер Јунајтед, сер Алекс Фергусон, е ослободен од функцијата како амбасадор на клубот, објавува „Атлетик“. Одлуката е донесена од сопствениците на „ИНЕОС“ како дел од мерките за намалување на трошоците на „црвените ѓаволи“.
Откако ја заврши својата тренерска кариера во 2013 година, Фергусон беше назначен за амбасадор на Јунајтед, извршувајќи ја оваа улога повеќе од една деценија со годишна плата од 2,16 милиони фунти. Исто така, тој е дел од фудбалскиот одбор на клубот, кој е различен од раководниот тим.
За мнозинските сопственици од семејството Глејзер никогаш не беше проблем да му плаќаат на 82-годишниот Шкотланѓанец за неговите претставнички функции, но финансиските мерки на „ИНЕОС“ го зафатија и него.
Минатата недела, ко-сопственикот Џим Ретклиф имал средба со Алекс Фергусон, на која му го соопштил своето решение. Тоа се случило на пријателски начин, а клупската легенда ќе продолжи да биде неизвршен директор и ќе биде добредојден на натпреварите на тимот.
