Тренерот на Пари Сен Жермен, Луис Енрике, го критикуваше својот тим дека им „подарил“ голови на Баерн Минхен и призна дека поразот во Лигата на шампионите можел да биде многу потежок.
Ова беше првиот пораз за актуелниот шампион во натпреварувањето по четири меча, и само втор неуспех во целата сезона. Баерн ја забележа својата 16. последователна победа во сите натпреварувања.
Првиот гол за Баерн падна по само четири минути, а вториот во 32., и двата дело на Колумбиецот Луис Дијаз, пред да биде исклучен на крајот од првото полувреме поради груб прекршок врз Ашраф Хакими.
„Се разбира, тие беа подобри од нас во првото полувреме. Создадоа повеќе шанси, а ние им направивме неколку прекрасни подароци во првиот дел“, рече Луис Енрике. „Кога подаруваш такви подароци на вакви играчи, тие ќе постигнат голови. Не барам изговори — наша одговорност е да бидеме подобри.“
Тој не успеа да објасни зошто неговиот тим настапил толку слабо, особено во првиот дел.
„Немам објаснување, едноставно така се случи“, изјави тој. „Направивме неколку подароци. Тие постигнаа два гола, но можеа да постигнат и четири. Разочаран сум од тоа, бидејќи очекував повисоко ниво од нас.“
Пари Сен Жермен настапи без повредениот Дезире Дуе, а за време на натпреварот повреди заработија Осман Дембеле и Ашраф Хакими.
„Кога повредените играчи се враќаат, тие не се во стопроцентна форма. Тоа е нешто со што треба многу подобро да се справам како тренер, имајќи го предвид целото мое искуство“, додаде Луис Енрике.
