Ливерпул направи последен обид да го убеди Трент Александер-Арнолд да остане на „Енфилд“ и да ја одбие можноста за трансфер во Реал Мадрид, пренесуваат шпанските медиуми.
Тимот на Арне Слот е во одлична форма во Премиер – лигата оваа сезона и му недостасува само уште една победа за да ја обезбеди 20. титула во својата историја. По последното коло, Арсенал има 13 бода заостанување зад „црвените“, откако Ливерпул го совлада Лестер со 0-1, а „топчиите“ славеа со 4-0 против Ипсвич.
Со приближувањето на крајот на сезоната, клубот го насочува вниманието кон иднината – вклучувајќи го и продолжувањето на договорите со клучните играчи. Мохамед Салах и Вирџил ван Дајк веќе потпишаа нови договори, но ситуацијата околу Александер-Арнолд останува нејасна.
Во последните месеци се појавија информации дека англискиот репрезентативец ги договорил личните услови со Реал Мадрид и дека летово ќе се пресели на „Бернабеу“.
Сепак, Ливерпул испратил последна понуда во обид да го задржи. Но, оваа понуда можеби доаѓа предоцна, затоа што околината на играчот смета дека неговата одлука е конечна.
Желбата за нов предизвик во Ла Лига и можноста да биде дел од проектот на Реал Мадрид изгледа премногу привлечна за 25-годишниот дефанзивец.
