Ливерпул испрати делегација во Бразил за да започне преговори со Сао Паоло за потписот на 19-годишниот централен бек Лукас Бералдо. 185 сантиметри високиот играч покажа одличен развој откако ја напушти академијата на Пирасиаба во 2020 година за да се приклучи на Сао Паоло, каде што минатата година се приклучи на првиот тим.
Бералдо има договор со Сао Паоло до летото 2026 година, но бразилскиот гигант тешко ќе го задржи во своите редови, бидејќи за него има интерес од голем број европски клубови.
Медиумите на Островот тврдат дека Ливерпул е решен да го заврши договорот за Бералдо што е можно поскоро, потенцијално во јануарскиот преоден рок, доколку успее да се договори со Сао Паоло во наредните недели.
„Црвените“ би можеле да бидат принудени да платат околу 20 милиони фунти за да ги победат останатите европски гиганти за потписот на Бералдо. На 19-годишниот играч, кој игра со левата нога, ќе му биде понудена и веднаш првотимска шанса на „Енфилд“, што можеби нема да се случи на друго место.
