Лидс официјално објави дека се разделува со менаџерот Сем Алардајс. Клубот од Јоркшир и Биг Сем се согласија спогодбено да ја прекинат соработката.
Сем Алардајс го презеде на 3 мај и го водеше Лидс на последните четири натпревари од сезоната, но не беше во можност да го спаси клубот од испаѓање во Чемпионшип.
„Ми беше чест да раководам со Лидс Јунајтед – голем клуб со неверојатна база на навивачи кои заслужуваат да бидат во Премиер – лигата. Навистина уживав во работата со персоналот и играчите во клубот и би сакал да ви се заблагодарам за можноста.
Во оваа фаза од мојата кариера, не сум сигурен дека преземањето на овој предизвик, кој е потенцијално долгорочен проект, е нешто на што би можел да се посветам, но му посакувам на клубот сѐ најдобро во иднина и се надевам дека ќе се врати во Премиер – лигата каде што припаѓа“, изјави Алардајс.
Лидс му се заблагодари и на Сем Алардајс и прецизираше дека во наредните недели ќе биде објавено соопштение за новиот менаџер на тимот.
