Фудбалската репрезентација на Македонија денеска (15 часот) во Струмица ќе игра пријателски натпревар против Ерменија. Добрата игра против Укранците во Прага, сепак, не го донесе посакуваниот резултат, но селекторот Благоја Милевски и избраниците ќе се обидат да дојдат до позитивен епилог на денешната средба.
Кога се носи дресот на Македонија, секој натпревар е подедднакво важен, вели Елиф Елмас, ѕвездата на Наполи.
„Ќе излеземе на терен сплотрни и ќе се потрудиме максимално да одиграме добар натпревар во кој се надевам дека ќе излеземе како победници. Одигравме одличен меч против Украина, но за жал го изгубивме. Дуелот против Ерменија е важен за нас, затоа одиме да победиме“, изјави Елиф Елмас.
Селекторот Благоја Милевски ќе им даде шанса за докажување на сите фудбалери.
„За натпреварот против Ерменија ќе им дадеме шанса на фудбалерите кои треба да го потврдат потенцијалот во репрезентацијата. По тешкиот и исцрпувачки меч во Прага, ќе видиме колку фудбалерите чувствуваат физички замор. Нема повредени играчи и пред натпреварот ќе одлучиме кој ќе започне. Контролниот меч против Ерменија, селекција која е квалитетна и одигра одлични квалификации е одлична можност за сите нас да го провериме потенцијалот со кој располагаме. Можност ќе добијат сите, но ќе одлучиме за минутажата на фудбалерите. Оваа селекција секогаш оди на победа, така ќе биде и против Ерменија“, истакна Милевски.
Натпреварот меѓу Македонија и Ерменија е закажан за 15 часот, на стадионот „Благој Истатов“ во Струмица.
