Капитенот на националниот тим на Франција, Килијан Мбапе, стана мнозински акционер во Каен за нешто помалку од 20 милиони евра, соопшти весникот „Паризиен“.
Така, 25-годишниот Мбапе стана еден од најмладите сопственици на фудбалски клубови во Европа. Тој е косопственик на клубот од Нормандија, заедно со претседателот на Надзорниот совет, Пјер-Антоан Каптон, кој го поседува останатиот пакет од акциите.
Мбапе откупи и дел од долговите на Каен, за клубот да нема проблеми со финансиските власти во Франција. Каен ја заврши минатата сезона на шестото место во Лига 2.
Килијан Мбапе играше седум години во Пари Сен Жермен, станувајќи најдобар стрелец во историјата на клубот со 256 голови. По завршувањето на сезоната, францускиот напаѓач направи трансфер во Реал Мадрид, а на подготовките ќе се приклучи на 7 август.
