Италијанскиот калчолигаш Монца ќе го ангажира ветеранот Кејлор Навас како слободен играч, објавуваат италијанските медиуми. Легендарниот 37-годишен костарикански голман утре ќе ги помине задолжителните медицински прегледи.
Кејлор Навас е вистинска легенда на голманската позиција. Костариканецот е трикратен победник во Лигата на шампионите со Реал Мадрид, трипати го освои и Светското клупско првенство со „кралскиот клуб“. Има и титула во Ла Лига во сезоната 2016/17 година, како и два трофеи од Суперкупот на Европа.
Со досегашниот клуб Пари Сен Жермен, ветеранот стана шампион трипати, а исто толку пати триумфира и во Купот на Франција.
Навас, кој минатата сезона одигра само шест натпревари за париските „светци“, учествувал и на три светски првенства со својата Костарика, а порано годинава објави дека се повлекува од националниот тим.
