Фудбалската репрезентација на Германија доживеа понижувачки пораз (6-0) од Шпанија во Лигата на нации и го загуби првото место во групата, но тоа нема да влијае на „животот“ на Јоаким Лев како кормилар на „маншафт“. Тој останува на кормилото иако „панцирите“ доживеаја болен пораз.
„Овој натпревар не менува ништо. Федерацијата има максимална доверба во Јоаким Лев. Поразот боли многу, но треба да се анализираат вистинските причини зошто дојде до таков дебакл. Брзо ја губевме топката, одбраната беше лоша, едноставно се тргна многу лошо на тој меч уште од стартот“, изјави директорот Оливер Бироф.
Поразот од Шпанија за Германците е најлош резултат (6-0) од 1931 година кога националниот тим загубил од Австрија со истиот резултат. Најубедливиот пораз на Германија е поразот од 9-0 од Англија, но во далечната 1909 година.
