Тренерот на Интер, Симоне Инзаги, упати пофални зборови за Давиде Фратези по победата над Лече со 4-0. Италијанскиот репрезентативец ретко е дел од почетниот состав, но вчера доби шанса и ја искористи, постигнувајќи го првиот гол за „нероаѕурите“. Останатите голови ги постигнаа Лаутаро Мартинез, Дензел Дамфрис и Мехди Тареми.
„Пристапивме на вистинскиот начин кон натпреварот, за што им честитав на момците. Не беше лесно, но игравме организирано и агресивно, бидејќи знаевме дека Лече нема да се двоуми да нѐ нападне. Ни беа поништени два гола поради минимални офсајди, исто како во Прага пред неколку дена. Се надевам дека фудбалерите ќе издржат, бидејќи веќе неколку месеци играме натпревари на секои три дена“, изјави Инзаги, кој стана тренерот што најбрзо стигнал до 200 победи во Серија А.
„Фратези беше нашето тајно оружје минатата сезона, заедно со Карлос Аугусто и Кристијан Аслани. Благодарение на нив немавме грижи кога некој беше повреден или суспендиран. Без нивниот придонес, немаше да го освоиме 20. Скудето. Имам одлична комуникација со Давиде. Тој имаше некои проблеми со кондицијата последните недели, но сега е целосно здрав. Веќе некое време сме без Чалханоглу, но Аслани игра одлично“, сподели тренерот на Интер.
„Последен пат примивме гол како гости во Серија А во септември во Удине. Тоа е резултат на многу работа. Среќен сум што и во Лацио, и сега во Интер, имам можност да работам со играчи кои ги следат моите идеи. Наполи и Аталанта имаат фантастична сезона, како и ние. Не се плашиме од овие два тима, но ги почитуваме бидејќи имаат добри тренери и играат квалитетен фудбал. Уште во јули кажав дека борбата за титулата ќе трае до самиот крај, и токму тоа се случува. Ги респектираме Наполи и Аталанта, но ние сме шампиони, така што воопшто не стравуваме од конкуренцијата“, додаде Инзаги.
