Претседателот на Светската фудбалска федерација (ФИФА), Џани Инфантино, изјави дека здравјето на фудбалерите останува приоритет за ФИФА, откако синдикатите поднесоа правна жалба против организацијата до Европската комисија. Синдикатите и фудбалските лиги ја обвинија ФИФА за злоупотреба на нејзината доминантна положба, според законите за конкуренција на Европската Унија.
„ФИФА продолжува да соработува со организациите на играчите за да обезбеди дека нивната добробит останува во фокус, и со нетрпение очекувам да продолжам да работам со Давид и сите во АФЕ за да ја постигнеме оваа цел“, напиша Инфантино на Инстаграм покрај фотографија со претседателот на шпанскиот синдикат на фудбалери (АФЕ), Давид Агансо, направена во Мајами, САД.
ФИФПро Европа, европското одделение на Светскиот синдикат на фудбалери, одби да коментира, но извори за „Ројтерс“ посочуваат дека средбата меѓу Агансо и Инфантино била од личен карактер.
Реорганизацијата на Светското клупско првенство се смета за клучен момент кој ги поттикна овие акции против ФИФА. Турнирот, кој ќе се одржи во САД, ќе заврши на 13 јули 2025 година, оставајќи многу малку време за одмор пред почетокот на подготовките за националните првенства.
ФИФА тврди дека распоредот е резултат на опширни консултации и ги обвини фудбалските лиги за лицемерие, бидејќи многу од нив, вклучувајќи ја и Премиер лигата, организираат свои претсезонски настани.
