Менаџерот на Манчестер Сити, Пеп Гвардиола, ја коментираше одлуката на Јирген Клоп да го напушти Ливерпул на крајот од сезоната. Каталонскиот стратег зборуваше за медиумите по победата во ФА Купот над Тотенхем.
„Сега ќе спијам помирно! Секој ден пред натпреварите против Ливерпул беше кошмар. Не можеме да го опишеме мојот период во Премиер-лигата, без Јирген и без Ливерпул. Тој е најдобриот противник што сум го имал“, изјави Гвардиола.
„Секако дека му посакувам сѐ најдобро на Клоп. Нема да признае, но ќе се врати еден ден, сигурен сум. Можеби ќе поминат 10 години, но ќе се врати. На фудбалот му требаат тренери и личности како него. Се надевам дека ќе се видиме и следната година и ќе вечераме заедно“, продолжи Пеп.
„Јас сакам да работам уште една година. Можно е и да потпишам нов договор“, додаде менаџерот на „граѓаните“.
