Менаџерот на Манчестер Сити, Пеп Гвардиола, изјави дека не сака неговиот тим да има среќа на утрешниот реванш од полуфиналето во Лигата на шампионите против Реал Мадрид, бидејќи Шпанецот посакува тимот што ќе оди во финалето да го заслужи тоа со својот настап на теренот.
Според него, „граѓаните“ не треба да прават ништо извонредно, само треба да играат на свој начин.
Сепак, Пеп признава дека Манчестер Сити мора да одигра подобро отколку на „Сантијаго Бернабеу“ пред една недела.
„Ова е веројатно еден од најважните натпревари, тоа не можеме да го негираме. Тоа е поради натпреварувањето, поради противникот, поради многу работи. Но, им кажав на играчите да ја искористат како огромна можност, да уживаат во моментот. Имаме неверојатна среќа што сме тука и сѐ е во наши раце. Сѐ зависи од нас. Ова е вистинска среќа. Не треба да правиме ништо необично. Треба само да бидеме свои и да победиме еден натпревар за да стигнеме до финалето. Имаме неверојатно чувство. Што и да се случи, сакам да им се заблагодарам и на играчите и на навивачите што повторно беа тука за нас. Нема да размислувам премногу за утре, не грижете се“, изјави Гвардиола.
Шпанецот признава дека Реал Мадрид е најтешкиот можен ривал.
„Емоциите ќе ги има и ќе бидат многу екстремни. Имаме план за игра. Мора да одиграме малку подобро отколку пред една недела, па мора да прилагодиме некои работи. Тие се за создавање на повеќе можности за нашите напаѓачи откако ќе ја одземеме топката од противникот. Во полуфиналето од Лигата на шампионите играме против Реал Мадрид. Го почитуваме противникот кој е најтешкиот со кој сме се соочиле во последните години. Тоа е голем предизвик и ние во радост го прифаќаме“, истакна менаџерот на Манчестер Сити.
Првиот меч во Мадрид заврши 1-1. Винисиус Жуниор донесе предност за Реал Мадрид, а израмни Кевин де Бруин.
