Тренерот на Аталанта, Џанпјеро Гасперини, како историски настан го оцени пласманот во финалето на Лига Европа, што е прв во историјата на клубот од Бергамо во европските натпреварувања.
„Финалето ќе биде историски настан. Навистина е неверојатно за тим како нашиот, но е добро за целиот фудбал. Не знам дали можеме да кажеме дека бевме беспрекорни, но дефинитивно доминиравме во реваншот. Тоа е во нашата крв. Се обидуваме да ја играме нашата напаѓачка игра на три различни начини. Можевме подобро да ги искористиме нашите шанси: неизвесноста се одржуваше додека Руџери не даде фантастичен втор гол“, изјави Гасперини по мечот.
Италијанскиот тим го елиминира Олимпик Марсеј со вкупни 4-1 и се пласираше во финалето на Лига Европа каде ќе се сретне со Баер Леверкузен. Натпреварот ќе се одигра на 22 мај во Даблин (Ирска) на стадионот „Авива“.
