Извршниот директор на шпанскиот прволигаш Бетис, Рамон Аларкон, го обвини Вест Хем за неуспехот да го комплетира трансферот на Пабло Форналс. Шпанецот требаше да се збогува со „чеканите“ по пет години, а Бетис се договори за трансфер од 8 милиони евра.
Проблемот е неверојатен, во клучните моменти откажал компјутерот во канцеларијата на Вест Хем.
„Имаше проблем со Форналс во последен момент, мислиме дека тоа е компјутерски проблем. Бетис ги испрати сите документи правилно и навреме и се чини дека Вест Хем имаше компјутерски проблем. Тоа не беше само со Бетис, туку и со други договори што ги имаа. Се надеваме дека ова ќе се реши во следните неколку дена“, изјави Аларкон.
27-годишниот фудбалер се бореше за минутажа оваа сезона, започнувајќи само четири натпревари во Премиер – лигата под водство на Дејвид Мојес – и се надеваше дека ќе го реши проблемот со преселбата во Ла Лига.
Сепак, зделката не се реализира, а Аларкон рече дека Бетис направил се што може, истовремено инсистирајќи дека не се откажале од надежта дека можат да добијат зелено светло за комплетирање на трансферот.
