ФИФА продолжува со својата борба против расизмот во фудбалот, воведувајќи построги мерки за казнување на расната дискриминација. Новите правила вклучуваат прекин на натпреварите доколку судијата забележи расистички навреди или ако играчите се пожалат на такви инциденти. Во крајни случаи, натпреварите може да бидат и предвреме прекинати поради расизам.
На 74. Конгрес на ФИФА во Бангкок беше донесена историјска одлука за одобрување на Глобалниот став против расизмот во фудбалот. ФИФА, во соработка со националните фудбалски сојузи, ќе активира програми и активности во пет клучни области: правила и санкции, акција на терен, кривични пријави, едукација и гласот на играчите.
ФИФА воведе тростепен процес кој ќе биде задолжителен во сите 211 национални федерации:
Прв чекор: Судијата го запира натпреварот. Играчите можат да користат глобално прифатена гестикулација против расизмот (вкрстени раце на градите) за да сигнализираат расистички инцидент.
Втор чекор: Ако расистичкото однесување продолжи, судијата ги праќа играчите во соблекувалните.
Трет чекор: Доколку расизмот не престане, натпреварот ќе биде трајно прекинат.
Оваа иницијатива доби дополнително внимание по инцидентите со играчот на Реал Мадрид, Винисиус Жуниор, кој повеќе пати јавно се пожали на расистички навреди и бараше построги мерки против дискриминацијата.
