Легендарниот фудбалер на Јувентус, Алесандро Дел Пјеро, се приклучи на критиките кон Кристијано Роналдо по елиминацијата на италијанскиот првак во осминафиналето на Лигата на шампионите. Трагичар на мечот беше Португалецот кој во 115.минута се исплаши од топката додека стоеше во жив ѕид и дозволи да му мине низ нозе и да го изненади голманот Шчешни. Порто со тој гол на Серџо Оливеира израмни на 2-2, а ниту крајниот триумд оф 3-2 не беше доволен за Јувентус да се пласира во следната рунда од елитното натпреварување.
„Роналдо со тој потег го издаде Јувентус, но не беше единствен. Сепак, тој има одговорност како лидер на тимот да го предводи и да направи се за Јувентус да биде подобар и да оствари успех. Јувентус еден час имаше фудбалер повеќе на теренот и направи многу малку за да го оствари посакуваниот резултат. Порто само ги чекаше на грешка и на крајот успеа да го дочека моментот“, изјави Дел Пјеро.
