Чави Хернандез ќе биде нов тренер на Барселона. Тој им соопштил на фудбалерите на Ал-Сад дека го напушта тимот и дека ќе се врати на „Камп Ноу“ за да ја преземе Барселна. Легендарниот играч за врска прво изјави дека е исклучиво фокусиран на својата работа во Ал-Сад, но од Каталонија доаѓаат поинакви информации.
Каталонскиот весник „Спорт“ тврди дека Чави ги договорил сите услови со Барселона и дека многу брзо треба и официјално да биде претставен како нов тренер на клубот од „Камп Ноу“.
„Спорт“ додава дека Чави веќе се простил од своите играчи во Ал-Сад, најавувајќи дека заминува во Барселона. Чави официјално треба да ја преземе клупата на Барселона на 4 ноември, а два дена подоцна би можел да дебитира на клупата на гостувањето кај Селта во Виго.
Чави е тренер на катарскиот клуб од летото 2019 година и го водеше на 89 натпревари.
Секако, Чави е една од најголемите легенди во историјата на Барселона, а за овој клуб запиша 767 натпревари на кои постигна 85 голови и подели 185 асистенции.
