Шампионот во Бундеслигата, Баер Леверкузен, ја плати цената на самозадоволување, откако ја прокоцка предноста од два гола и загуби контрола врз натпреварот, пред да одигра 2-2 против Холштајн Кил на домашен терен. „Аспирините“ постигнаа два гола во првите осум минути, но ја загубија предноста од два гола по третпат во шест натпревари од првенството оваа сезона.
„Не сум задоволен од нашата игра. Вината е наша. Не игравме интелигентно и мислевме дека натпреварот е завршен, но во фудбалот мораш постојано да играш со ист интензитет. Бевме премногу пасивни. По големиот натпревар во Лигата на шампионите, немавме правилен пристап за овој натпревар“, изјави тренерот Чаби Алонсо.
Шампионите и освојувачи на Купот на Германија од минатата сезона, кои го победија Милан со 1-0 во Лигата на шампионите во вторникот, упатија 24 удари кон голот, девет само во првите 12 минути. Целосно доминираа во првото полувреме, во кое требаше да постигнат повеќе голови и да го решат натпреварот.
„Имавме контрола, но без агресивност да постигнеме трет гол. Првиот гол на гостите непосредно пред полувремето беше сигнал дека може да стане опасно. Но, најголемата грешка ја направивме во првото полувреме, бидејќи не знаевме како да се справиме со натпреварот после 2-0. Едноставно, не бевме доволно интелигентни. Покажавме малку самозадоволство, кога требаше да бидеме повеќе концентрирани. Но, ќе научиме“, прокоментира Алонсо.
Баер Леверкузен падна на петтото место на табелата со 11 бода. Баерн Минхен, кој е на врвот со 13 бода, денеска му гостува на Ајнтрахт Франкфурт.
