Асот на Арсенал, Букајо Сака, всушност не е блиску до враќање на теренот иако во последните денови се појавија такви информации откако клубот објави негови фотографии од фитнес-тренинзи за време на подготовките во Дубаи. Според медиумите на Островот, англискиот репрезентативец, кој беше опериран на крајот на декември, може да отсуствува уште осум недели и да се врати во игра дури во средината на април.
Нема компликации со неговата повреда, но поради нејзината сериозност, клубот нема да ризикува и ќе почека максимално долго за да се осигура дека Сака ќе биде целосно рехабилитиран.
Откако клубот потврди дека и Кај Хаверц ќе биде надвор од терените до крајот на сезоната, менаџерот на Арсенал, Микел Артета, остана во нападот само со Леандро Тросар, Рахим Стерлинг и Итан Нуанери, кои во моментов се достапни. Никој од нив не е класичен напаѓач, но еден од нив ќе мора да ја преземе таа улога. Можно е и Артета да ротира меѓу своите офанзивни фудбалери во зависност од ситуацијата.
