Фудбалерот на Арсенал, Букајо Сака, е прогласен за добитник на наградата „англиски играч на годината“ од страна на Фудбалската асоцијација. Тоа е признание за најголем придонес во националниот тим за изминатата година.
Сака (22) ја освои наградата втора година по ред, пред капитенот на националниот тим Хари Кејн и новото засилување на Реал Мадрид, Џуд Белингем.
Сака за репрезентацијата на Англија дебитираше во октомври 2020 година, а во последните 12 месеци одигра 10 натпревари за „трите лава“ на кои постигна седум гола. Три гола беа негово дело на Светското првенство во Катар, каде Англија стигна до четвртфиналето.
Против Македонија оваа пролет Сака го забележа својот прв хет-трик за Англија.
Англиската фудбалска асоцијација на крајот на септември ќе го објави и добитникот на наградата за играч на годината.
