„Болницата“ во Барселона повторно доби нов член, бидејќи на денешниот тренинг се повреди капитенот Серхи Роберто. Тој ќе отсуствува од две до три недели поради повреда на мускулот, поради која ќе пропушти три последовни натпревари против Атлетик Билбао, Шахтјор и Реал Мадрид.
Иако Алехандро Балде и Ламине Јамал денеска се вратија по полесни повреди, Серхи Роберто се приклучи на долгата листа на повредени играчи на која се и Педри, Френки де Јонг, Жул Кунде, Рафиња и Роберт Левандовски.
Рафиња и Педри се најблиску до враќање и имаат шанса да играат против Шахтјор Доњецк следната среда.
По нив се очекува зелено светло за „Ел Класико“ на 28 октомври да добие Роберт Левандовски, а Де Јонг, Кунде и Роберто засега сигурно ќе го прескокнат дуелот со Реал.
За се да биде уште поинтересно, оваа недела Барса јавно објави дека е во потрага по нов кондициски тренер, бидејќи бројот на повреди сезонава е загрижувачки.
