Каталонскиот гигант Барселона нема така лесно да дозволи францускиот ас Килијан Мбапе ова лето да се пресели од Пари Сен Жермен во Реал Мадрид. Како што открива „Л’Екип“, раководството на Барселона ќе се обиде да го убеди Мбапе наместо на „Бернабеу“ во последен миг да пристигне на „Камп Ноу“.
„ПСЖ е известен за намерата на Барселона да го ангажира фудбалерот во летниот преоден рок. Барселона игра според правилата, поради тоа го известиле ПСЖ. Правилата на ФИФА во ваков случај се јасни, клуб што сака да ангажира играч кој се наоѓа во последните шест месеци од договорот, може да преговара директно со фудбалерот, но претходно мора да го извести неговиот актуелен клуб“, пишува „Л’Екип“.
Следниот потег на Барселона ќе биде тренерот Чави Хернандез да му објасни на Килијан Мбапе дека на „Камп Ноу“ се создава тим кој ќе владее со европскиот фудбал во наредните десетина години.
