Барселона постави бомбастична цена од 100 милиони евра за нивниот најдобар дефанзивец Роналд Араухо. 25-годишниот Уругваец е цел на интерес на неколку клубови од Европа и на „Камп Ноу“ се разгледува опцијата за негова продажба за да се засили буџетот за следната сезона. Сепак, тоа ќе се случи само доколку Барса добие понуда која ги задоволува финансиските барања, пишува каталонскиот „Спорт“.
Во последните месеци се шпекулираше дека Араухо го бараат Манчестер Јунајтед и Баерн Минхен. Во оваа фаза, сепак, ниту еден клуб не е подготвен да плати слична сума за да ги обезбеди неговите услуги. Од друга страна, двата клуба можат да му понудат на дефанзивецот многу подобра плата и тоа може да доведе до тоа и играчот да ги притисне шефовите на Барса за трансфер.
Доколку не се постигне договор и Араухо остане на „Камп Ноу“, клубот може да размисли да му понуди продолжување на договорот, кој истекува во 2026 година. На овој начин Каталонците нема да мораат да се грижат дека подоцна треба да го ослободат бесплатно, а во меѓувреме и играчот ќе добие зголемување на платата и тоа ќе ја намали евентуалната тензија.
Барселона не планира активно да бара купувачи за Араухо, но доколку се појават такви, сигурно ќе седне на преговарачка маса.
