Енис Барди е желба на Еспањол, но македонскиот репрезентативец нема намера да инсистира на трансфер бидејќи е среќен како член на Леванте. Тој по првите тренинзи во текот на летово уште еднаш ја потенцираше својата лојалност кон сегашниот тим, но и изрази желба за подобри резултати од ланската сезона, кога оваа екипа едвај се избори за опстанок во „Ла Лига“.
„Одлично сум примен од првиот ден во овој клуб. За млад играч е многу важно од самиот почеток да му биде олесната адаптацијата, како што тоа беше случај со мене во Леванте. Јас сум благодарен поради тоа и сакам да возвратам со нови добри партии. Не смееме да ги повториме грешките од ланската сезона, мораме да бидеме подобри од лани, да имаме помирна сезона и да не се тресеме до самиот крај за прволигашкиот опстанок. За среќа, минатата сезона се извлековме, очекувам во новата сезона да бидеме уште подобри“ – порача Енис Барди.
