Извршниот директор на Баер Леверкузен, Фернандо Каро, откри дека клубот има посебен договор со тренерот Чаби Алонсо кој се однесува на неговото евентуално заминување.
Во контекст на сè погласните шпекулации за заминувањето на Карло Анчелоти од Реал Мадрид и можноста Чаби Алонсо да го преземе кормилото на „кралскиот клуб“, Каро потврди дека Баер Леверкузен нема да му застане на патот доколку дојде понуда од некој од неговите поранешни клубови.
„Имаме џентлеменски договор со Чаби Алонсо. Доколку дојде клуб за кој тој настапувал како играч, ние ќе седнеме, ќе разговараме и нема да го спречиме да потпише за нив“, изјави Каро за германските медиуми.
Алонсо како играч го носеше дресот на Ливерпул, Реал Мадрид и на Баерн Минхен, но токму поврзаноста со шпанскиот гигант повторно ја актуализираше темата за неговото заминување, особено со оглед на тоа што се очекува Анчелоти по завршувањето на сезоната да го преземе бразилскиот национален тим.
Алонсо блеска на клупата на Баер Леверкузен и ја предводеше екипата кон историска сезона, што дополнително го засили интересот за неговите услуги од страна на европските фудбалски гиганти.
