Микел Артета потврди дека Арсенал ќе направи шпалир за новиот шампион Ливерпул пред нивниот меѓусебен натпревар на „Енфилд“ в недела. Шпанскиот стратег покажа почит кон тимот на Арне Слот, истакнувајќи дека Ливерпул ја заслужил титулата поради постојаноста и квалитетот.
„Ливерпул го заслужува ова. Тие беа најдобриот тим, најконзистентен. Она што Арне и неговиот тим го направија е фасцинантно. Одлична работа. Таков е спортот – кога некој е подобар, му честиташ и се обидуваш да го стигнеш тоа нивo“, рече Артета.
Тој се осврна и на елиминацијата од ПСЖ во Лигата на шампионите, нарекувајќи го моментот „еден од најтажните, но и најгордите“ како тренер на Арсенал, бидејќи тимот отпаднал со високо крената глава.
Артета верува дека неговиот тим заслужувал многу повеќе, особено со оглед на статистиката.
„Да, 100%. Бевме најдобри во турнирот, имавме најдобра гол-разлика и најдобра статистика. Со такви бројки, имате голема шанса да ја освоите Лигата на шампионите.“
Што се однесува до Премиер – лигата, Артета призна дека тимот направил чекор назад во споредба со минатата сезона:
„Со освоените поени оваа и минатата сезона, можевме да освоиме две титули. Не сме само блиску – ние сме таму. Сега ни треба малку повеќе среќа и да се надеваме дека никој нема да биде подобар од нас“, дополни менаџерот на Арсенал.
