Англискиот премиерлигаш Арсенал планира дополнително да се засили во зимскиот преоден рок. Според последните информации, Микел Артета побарал од управата на клубот да му го доведат Мартин Зубименди.
Играчот од средниот ред на Реал Сосиедад стана стандарден шпански репрезентативец иако има пеколна конкуренција во Родри, а Барселона долго време се обидува да го ангажира.
Сепак, тој летово потпиша нов договор со баскискиот клуб, а како што изјави тогаш „размислува само за настап за Реал Сосиедад во Лигата на шампионите“.
Сепак, Арсенал сериозно „загриза“, што го потврдува и фактот дека Артета е подготвен да ја плати ослободителната клаузула од 60 милиони евра.
Јасно е дека Артета чувствува дека Деклан Рајс и Зубименди би биле идеална двојка во средниот ред, со Мартин Одегард пред нив.
Зубименди е одличен во додавањето на топката, која знае умешно да ја чува кога е под притисок и тактички е речиси совршен.
