Неапол чекаше 33 години за нова, трета шампионска титула во Италија, која ја донесе Лучијано Спалети, но тоа не значи дека искусниот италијански стручњак ќе го води овој тим и во следната сезона.
„Газета дело Спорт“ пишува за лошите односи меѓу Спалети и претседателот на клубот Аурелио де Лаурентис, споредувајќи ја ситуацијата со онаа во 2018 година кога Маурицио Сари и Жоргињо го напуштија Неапол поради слични причини.
Очигледно, Спалети не е задоволен од тоа што Наполи го активираше автоматското продолжување на соработката без негова согласност, за што бил информиран по пошта.
Поради оваа причина Италијанецот не беше присутен на прес-конференцијата на која Де Лаурентис зборуваше за плановите за претстојната сезона.
Италијанците наголемо шпекулираат за тоа кој би можел да го замени Спалети во случај на негово заминување, а посочени се две имиња.
Едно е добро познато во Неапол, Рафа Бенитез кој веќе раководеше со „наполитанците“ во периодот од 2013 до 2015 година, а без работа е од минатата година кога го напушти Евертон.
Вториот е Антонио Конте, кој оваа сезона замина од Тотенхем, а освои титули во Италија со Јувентус и со Интер, па во Неапол очигледно веруваат дека истото може да го повтори и на стадионот „Диего Армандо Марадона“.
