Фудбалската репрезентација на Македонија го загубо и вториот натпревар на Европското првенство. Подобра од селекцијата на Игор Ангеловски беше Украина, а најдобар играч во нашиот тим беше голманот Столе Димитриевски. Одбрани пенал и имаше уште неколку фантастични интервенции.
Селекторот Игор Ангеловски вели дека Македонија во вториот дел покажа зошто е на ЕВРО. Само што позитивен резултат на Европско се остварува ако играш без осцилации во текот на цел натпревар.
„Целта беше да бидеме внимателни во првото полувреме, а потоа да бараме победа. Тие постигнаа гол кој за неколку сантиметри не беше офсајд, а на спротивната страна не го признаа голот на Пандев кој беше во офсајд за неколку сантиметри. Во второто полувреме покажавме зошто сме на Европско првенство. Навивачите не испратија со аплауз и тоа ни носи задоволство и покрај поразот. Секако, останува жалење што не остваривме позитивен резултат. Ако одиграме против Холандија како во второто полувреме, тогаш можеме да се надеваме на нешто повеќе“, изјави Игор Ангеловски.
Македонија сега се сели во Амстердам, каде на 21 јуни ќе го игра последниот натпревар од групата против домаќинот Холандија.
