Фудбалската репрезентација на Македонија во десеткуван состав ќе ги очекува двата последни натпревари од квалификацискиот циклус за ЕВРО 2020, против Австрија во Виена на 16 ноември и три дена подоцна против Израел во Скопје. Селекторот Игор Ангеловски очекува националниот тим сепак да биде на вистинското ниво и покрај изостаноците.
„Алиоски и Тричковски отпаднаа, затоа го повикав Костадинов. Дарко Велковски и Стефан Ристовски сигурно доаѓаат, имаме и тројца суспендирани за мечот со Австрија, но верувам дека ќе бидеме на ниво. Сакаме да го задржиме третото место. Австрија е фаворит, но ние сакаме да ги заокружиме квалификациите на добар начин“ – изјави селекторот Игор Ангеловски.
Одбранбениот фудбалер Висар Муслиу нема право на настап против Австријците, заедно со Бобан Николов и со Илија Несторовски, но верува дека Македонија може да одигра на потребното ниво на последните два меча.
„Нема да играм против Австрија, но ги охрабрувам соиграчите и верувам дека ќе одиграат на високо ниво против Австрија, особено во одбраната“, изјави Висар Муслиу.
