Македонија утре и гостува на Австрија во претпоследното коло од квалификациите за Европското првенство во 2020 година. И покрај големиот проблем со повредите и жолтите картони на стандардните репрезентативци (меѓу кои и последната на Пандев), селекторот Ангеловски верува во сите фудбалери кои ги има на располагање дека ќе дадат максимум за позитивен резултат.
„Австрија беше доминантна во текот на квалификациите, тие се на прагот на пласман на Европско првенство, но ние си ја гледаме нашата работа. Имаме кадровски проблеми, но и рековме дека нема да се жалиме, така и ќе биде, ќе играат тие што се подготвени и јас верувам во нив. Можно е шанса да добијат и некои дебитанти, но ако им е прв меч не значи дека немаат квалитет. Сигурен сум дека утре сите фудбалери ќе го дадат максимумот и ќе одиграат најдобро што знаат. На овие мечеви сакаме да го потврдиме квалитетот и да се подготвиме за полуфиналето на Лигата на нации“, изјави Ангеловски.
Стефан Ристовски вели дека фудбалерите секогаш имаат максимални мотиви кога играат во дресот со националниот грб.
„Апсолутно имаме и желба и мотиви да одиграме најдобро што можеме во моментот. Имаме проблеми, но верувам дека сите што ќе истрчаат ќе бидат на потребното ниво, со срце. И исто така мислам дека не можеме да бидеме така слаби како на првиот меч против Австрија. Се разбира, ривалот има силен состав, но ние сме фокусирани да одиграме на вистинското ниво и овие квалификации д ги заокружиме на добар начин, како и што ги игравме досега. Ако сакаме Македонија да игра на Европско првенство, секој меч е најважен за нас. Така е, и така ќе биде со оваа генерација“, изјави Стефан Ристовски, кој ќе ја носи капитенската лента доколку Горан Пандев не биде во можност да настапи на утрешниот меч.
Во овие моменти фудвалската репрезентација на Македонија го одржува официјалниот тренинг на стадионот „Ернст Хапел“. Натпреварот ќе се одигра утре со почеток во 20:45 часот.
