Вечерва во Лигата на шампионите нè очекуваат нови два возбудливи реванш-натпревари од четвртфиналето. Откако синоќа Барселона и Пари Сен Жермен изборија пласман во полуфиналето, сцената сега е резервирана за мечевите Интер – Баерн и Реал Мадрид – Арсенал.
Интер ќе ја брани предноста од првиот меч против Баерн Минхен, но целото внимание е насочено кон спектаклот во Мадрид.
Реал Мадрид, кој неочекувано загуби со високи 3-0 на „Емирати“ од Арсенал, ќе се обиде да направи историски пресврт пред својата публика. Иако „топчиите“ станаа новите фаворити за трофејот, мадриѓаните се познати по своите камбек приказни во ова натпреварување.
Според „Дефенса Сентрал“, тренерот Карло Анчелоти подготвува изненадување – Бразилецот Ендрик треба да биде главниот адут вечерва. Наместо Лука Модриќ или Брахим Диаз, токму младиот напаѓач ќе добие клучна улога, со задача да прави пресинг, да отвора простор и да создава шанси.
Ова би можел да биде неговиот голем момент на европската сцена. Досега, секогаш кога добил шанса, Ендрик ја оправдал довербата со борбеност и креативност.
Реал се надева на магија на „Бернабеу“, додека Арсенал сака да ја круниса сензацијата.
