Анализа на Антонио Филевски: Адеми ќе ја води Македонија до СП во Катар, Столе е столб на тимот

МАКФУДБАЛ во Порто,

Фудбалската репрезентација на Македонија вечерва (20.45 часот) на „Драгао“ ќе води битка за пласман на Светското првенство против поранешниот европски првак Португалија. По елиминацијата на Италија (0-1) во Палермо, македонските херои ќе треба уште еднаш да се надминат себеси во дуелот со Кристијано Роналдо и дружината, повторно на гостински терен, во Порто, за да го остварат сонот на сите генерации – Македонија да биде дел од Светско првенство.

Првиот Македонец кој заигра во Португалија, во сега далечната 1993/94 сезона беше голманот Антонио Филевски. Тој беше дел од тимот на Рио Аве. Поранешниот репрезентативец, а потоа и член во стручниот штаб на А-тимот, верува дека Македонија има шанси да се пласира на мундијалот. Главна фигура, според него, треба да биде Аријан Адеми.

„Доколку Адеми е здрав и 100% подготвен, ќе биде главниот наш играч до успех, тој е роден ВОДАЧ , добар техничар , со беспрекорна прецизна прегледност на теренот , одлична позициска поставеност во дефанзива , со опасни придодавања во нападот. Ако Адеми биде на 100% и одигра како што умее, тогаш и останатите играчи со негова помош и мотивација, поставеност, ќе го дадат максимумот од своите квалитети и имаме добри шанси за успех! Тој едноставно е роден ЛИДЕР!“, анализира поранешниот репрезентативен голман Антонио Филевски, кој своевремено беше дел и од стручниот штаб во А-тимот на Македонија.

Неизбежно е прашањето и за голманската позиција и сигурноста што ја влева Столе Димитриевски во дефанзивниот дел од селекцијата.

„Со сигурноста што ја дава Столе, со својата смиреност и европски квалитети – и невозможното е возможно! Голема работа е да имаш ваков голман во репрезентацијата! Веруваме во успех и се надеваме на најдобро. Само напред, Македонци“, порачува Антонио Филевски.

Дуелот меѓу Португалија и Македонија за пласман на СП во Катар е закажан за 20.45 часот, на стадионот „Драгао“ во Порто.