Капитенот на фудбалската репрезентација на Србија, Александар Митровиќ (30), би можел да направи сензационален чекор во својата кариера и да се пресели во гигантот Реал Мадрид.
И покрај тоа што „кралевите“ располагаат со напаѓачки ѕвезди како Килијан Мбапе, Винисиус Жуниор и Родриго, тимот минатата сезона ја заврши без ниту еден трофеј. Според многумина, токму отсуството на класичен напаѓач – типична „деветка“ – било главната причина за неуспехот.
Со доаѓањето на новиот тренер Чаби Алонсо, започна и реконструкцијата на составот. Неколку имиња веќе си заминаа, а нови засилувања како Франко Мастантуоно, Дин Хујсен и Трент Александер-Арнолд пристигнаа на „Сантијаго Бернабеу“. Сега Алонсо бара и типичен голгетер, а Митровиќ е високо на неговата листа на желби.
Според шпанскиот портал „Defensa Central“, српскиот напаѓач ќе има можност да се покаже токму против Реал Мадрид на Светското клупско првенство. Доколку остави добар впечаток, трансферот би можел да биде финализиран веднаш по натпреварот.
„Тој има сè што му е потребно на Реал Мадрид: физичка доминација, способност да ја задржи топката, одличен преглед на играта и инстинкт за гол. Особено се истакнува во воздушните дуели – негова препознатлива сила,“ пишува порталот.
Со своите 30 години и богато искуство, Митровиќ би можел да биде важен елемент во новиот проект на Алонсо.
