Германскиот првак Баерн Минхен ќе мора без Серж Гнабри на реваншот против Арсенал, пренесуваат „Билд“ и „Скај Спорт Германија“.
28-годишниот крилен напаѓач на Баварците заработи повреда на синоќешниот натпревар и беше принуден да излезе од игра во 70. минута.
Гнабри најверојатно претрпе истегнување на тетивата и се очекува да биде надвор од терените најмалку три седмици. Дополнителните тестови ќе се одржат во Минхен.
Гнабри оваа сезона се мачеше со повреди, поминувајќи долго време надвор од тимот поради повреда на мускулот. За Баерн во досегашниот дел од сезоната има 17 настапи и пет гола, а синоќа постигна гол во ремито против Арсенал (2-2).
