Поранешниот англиски репрезентативец Пол Инс изјави дека напаѓачот на Ливерпул, Мохамед Салах, не е играч од светска класа. Изјавата на поранешниот играч од средниот ред, кој во кариерата настапуваше и за Манчестер Јунајтед и за Ливерпул, доаѓа по дербито меѓу двата тима изминатиот викенд.
Иако Салах постигна гол од пенал за 2-2, египетскиот репрезентативец пропушти неколку многу добри можности за гол.
Со својот гол Салах стана играчот кој постигнал најмногу голови на „Олд Трафорд“ против Манчестер Јунајтед – вкупно 11.
„Мислам дека неговиот рекорд зборува сам за себе. Но, дали тој е играч од светска класа? Технички, не мислам така“, изјави Пол Инс.
Мохамед Салах дојде во Ливерпул во 2017 година од Рома. Оттогаш, египетскиот интернационалец постигна 209 гола на 340 натпревари за „црвените“.
